Facebook
برد العجوز وجدتي PDF طباعة أرسل إلى صديق
الكاتب: حسين القاصد   
الأحد, 11 كانون2/يناير 2015 22:09

 

7ssenal8asd
لايجوز تكرار النشر دون الاشارة لمجلة سطور

 

هذا البرد صدكَـ مال كَبل !! مو من هذا الجديد ساعتين مايطول !! وهو هواي مضكور بالكتب وكَبل أهلنه يخافون من الأزركَـ واجويريد والعجوز واما الأزركَـ فقد اختفى منذ تجفيف الاهوار وصارت درجة حرارة 60 هي افضل جو عند العراقيين ، واما (اجويريد) فهو مشتق من حالة المواطن تحت البرد حيث يرتدي كل ما يجده من ملابس ويسمونها أهلنا (جرود ) كونها مستعملة جدا !! وبفضل البالات والانتعاش الاقتصادي !! قضينه على اجوريد ، بقت بس العجوز ، وهاي دائما كاعدة هي وصديقتها الصوبة علاء الدين !! بزاوية من الغرفة وترطن !! ساعة تحجي على اثيل النجيفي وساعة عالمالكي .. ونوبات تفكر بانفجارات فرنسا !! وساعة وتكول اللهم انصرنا على القوم الكافرين ( بس ماتحددهم تخاف لأن اغلبهم يصلون جمعة !! ) وساعة تتعارك وي الجهال لأن ينفخون عالصوبة وتصير نارها حمرة !! والعراقيين يحبون النار الزركة مدري ليش !! ماعلينا بالوادم ، اخر موديل من العجايز جانت بيه جدتي اللي عاشت من الاحتلال العثماني لحد يونس محمود !! وجدتي تضوج من يونس محمود تكول : متعافي يبني جامع بفلوس حرام !! ومن سألتها ليش فلوس حرام ؟؟ تكول جا هو جابهن بيده ؟؟ لو جايبهن بيده حلال بس جابهن برجله !! ماعلينا بفقه العجايز !! جدتي نوبات تخرّف مثلي ، بس اليوم بالبرد تضكرتها وباوعت بزاوية الغرفة وشفت ماكو لا علاء الدين ولا جدتي .. طبعا أحنه العراقيين مانشتغل ولانتعب نفسنه ونحب علاء الدين حتى يجيب المصباح السحري ويوفر الدفوو !! ..
ها جدة ؟؟
أكلك جدة هم موش جانو يوزعون بطانيات وصوبات حتى الوادم تنتخبهم ؟؟ جا هسة شنهي ؟؟ بس يوزعون مفخخات علوادم ؟؟
الله يرحمج جدة !! السالفة موووووووش خوش جدة .