Facebook
الموز حق PDF طباعة أرسل إلى صديق
الكاتب: حسين القاصد   
الخميس, 18 آب/أغسطس 2016 21:25

7ssenal8asd
من المضكورات بالكتب ، يكولون چان الخميس ـ قبل عشرين الف سنة هو اول يوم بالاسبوع ، والوادم چانت تداوم بعد عطلة الاربعاء ، ويرحون لدوامهم بالخميس نشطين وتصير ازدحامات والموظفين يضوجون من الخميس لأن الشغل كله مكدس من الثلاثاء على اعتبار الثلاثاء نهاية الاسبوع ونص دوام ، والوادم بالثلاثاء چانت تسهر وتعربد لأن الاربعاء عطلة وتبقى نايمة للظهر ، و چانت بعض القبائل تجمع البعران المفخخة كلها وتضمها للخميس حتى من يبدي الدوام يفجرون الجمل بماحمل ، يكولون راح وكت واجه وكت ، كامت الدول النامية (كلش ) تعطل ثلاثاء واربعاء بسبب حرارة الجو مال كبل !! وبعدين ورا صلح الحديبية اتفقوا على دخول مكة ومن دخلو مكة تغير الدوام والوادم افتر راسها ، كامت ماتعرف خميسها من (حماها ) واشتغلت حروب (الروحة) وحروب (الردة) ، وظلت الوادم تحارب (روحة ـ ردّة) تكول صاعدين بـ (كيا) مرجع ، والكيا مال كّبل هي بعير ابو نفرين!! ، وبعدين صارت الفتوحات والناس الله فتحها بوجها وصارت الجرايد ، وجان حسين القاصد مال كَبل يكتب مضكورات ويسولف بكيفه .. بس صارت بذاك الوكت طلابة چانت الوادم تسهر عالفانوس السحري لأن كهرباء ماكو وابو المولدة مال كَبل ماعند كَاز !! و چان الاضطراب الامني واصل لاخوة موزة مال كَبل !! لأن چانت موزة كلما تتوازى وطلعت تهوس : نحن بنات طارق .. نمشي على النمارق ... والوادم تستحي تحچي .. وطارق مغلس مايصيح على بناته ويكَلهن ولچن عيب .. ليش تمشن على النمارق ؟؟ والفضيحة الچبيرة من چانن يكَولن (المسك في المناطق ) وهي هاي سبب الفتنة !! يكَولون بوكتها طارق شرد وعاف بناته ، والوادم كلها دايخة بالمسك الموجود بالمناطق ، ومن ذاك اليوم لحد كتابة هذا العمود والعراق مامرتاح بسبب المسك اللي بالمناطق (المتنازع عليها ) والبرلمان مال كَبل عايف طارق وبناته براحتهن وعايف المناطق المتنازع عليها وحاير بميزانية جديدة يريد يستورد بعران ، وبنات طارق يسرحن ويمرحن ساعة بـ (قطر) مال كَبل وساعة بتركيا .. والشعب العراقي بذاك الوكت چان حاير بشغلة (قطر) مال كَبل لأن ما معقولة : دولة مساحتها (مسكول ) وعدد نفوسها اقل من عدد شعراء العراق .. وباقية تصرف على المناطق مال بنات طارق .. وبدلا من موزة واخوتها صار الموز بالشوارع وكَامت الوادم تخاف تطلع ، والاحزاب الاسلامية مال كَبل چانت رافعا شعار لترويج البضاعة القطرية لابادة الشعب العراقي والشعار هو : (الموز) حق !!