Facebook
حرارة فوق منتصف الغليان PDF طباعة أرسل إلى صديق
الكاتب: حسين القاصد   
السبت, 01 آب/أغسطس 2015 19:34

 

7ssenal8asd123
لايجوز تكرار النشر دون الاشارة لمجلة سطور

 

يكولون كَبل 20 الف سنة ، صارت موجة مال حر بالعراق ، حتى الناس انقهرت على جهنم !! وكَالوا احتمال هسة هناك أبرد ، المهم جان أحد الرفاق الأشاوس يكَول :
نحن الذين وهبنا الشمس رفعتها
فإن غضبنا تهاوى صرحها حطما !!
بهاي الاثناء جان الحشد الشعبي يطارد الدواعش ، وجان بعض الشيوخ حايرين بالبيعة !! اي جا هو الخليفة شوية ! ولو هم ( فوكـ البيعة اساسا .. لأن حتى دكَة ميزان مابيهم ) ...
وعلى صعيد متصل ( نعتذر ماكو اتصالات لأن العراقيين طفو الموبايلات حتى تتأدب شركات الاتصال ) ، وكَبل الوادم يكولون على ابو الاخبار فاسق !! وحتى بالقرآن الكريم ( اذا جاءكم فاسق بنبأ ... ) يعني مثل خبر تجميد وزير الكهرباء اللي بثته الشرقية !! جا اذا عدكم كهرباء ماتخلونه نجمد ماي !! بس لا سدو البارات علمود يوفرون ثلج لتجميد الفهداوي ..
المهم .. جانت الوادم تكول بأيام الحر ان هاي الايام تبوّل المطي .. وصادفت مرة من المرات غضبوا الربع فتهاوى سيل الشمس حطما !! واحتركـ الجو .. فركضت الوادم حتى تتأكد وتشوف المطي بايل لو لا ؟
ولما وصلو شافوه مو بايل !! لذلك نقلت قناة الشرقية اخبار التظاهرات وكالت جمدوا وزير الكهرباء ، والوادم كذبت الخبر وكالت : لا الوزير تجمد وحتى المطي ( موبايل) !! وحدث لغط وهرج ومرج وتضارب بالانباء .. عفية بلد كلشي بيه يتضارب حتى الانباء .. المهم ، ماعلينا بالوادم .. يكولون العالم انتبهت وقررت اطفاء الموبايل لمدة ساعة ..
لأن هذا البلد اكثر معاناته من البول .. شبعنه قهر والعباس جبنهاها ضيم .. من بول البعير الى بول بريمر ..
لا يابه هسة تهاوى سيلها حطما !! جا وين نولي ؟؟ اذا ابو المثل يكَول العشرة الأولى من آب (تدّيح ) النواب !!