Facebook
فاهمين الشغلة غلط PDF طباعة أرسل إلى صديق
الكاتب: لبنى الحسو   
السبت, 27 حزيران/يونيو 2015 08:54

 

lbnaaa copy copy copy
لايجوز تكرار النشر دون الاشارة لمجلة سطور

 

منو گال احنا شعب عاطفي اريد اضربه بطلقة واخلص منه ،
اذا كان لابد من اطلاق صفة للعراقيين فراح اختارلهم ،، صفة ،، شعب متدين
يحب الدين ،
وهذا الحب مجاي اعتباطي ،، انما هو نتاج مراحل القهر والضيم ،،،
شاف العراقي ان الطريق الوحيد الي لازم يسلكه حتى ينجو من الغمة هو التوسل بالله والتشبث بتعاليمه وتنفيذها حرفياً بدون نقاش ،، معتقد انه دينفذ صح ،، وان الدين كيفما كان طريق للنجاة ،،
لكن بنفس الوقت هو فاهم غلط وديطبق غلط ،، گولوا شلون ؟
_ ابو علي بلا زحمة عليك المبلغ الي داينتك اياه وفكيت ضيقتك بي ،،
_ شبي ؟
_ والله محتاجه هسة بلكي ترجعلي اياه ،،
_ والله متستحي انت !! مو عيب اداعي بفلوسك ،، مو توني اخذتهم منك مصار ست اشهر ،، شدعوه عليك بس صدگ مگيوله ( عاب شي المايشبه اهله )،،
_ شبيك ابو علي طلعتني حرف ساقط شدعوه ،، ردت فليساتي بس ، لعد لو اريد منك نفع فوگاهن جان اسويت ،،
_ تريد نفع بعد ،،،، ايباه شوف الوكت ،، عمي من رخصتك اروح اصلي الظهر بالجامع ،. گبل ما اشيل ذنوب ،،
_ ابو علي وفلوسي ،، ؟ الجامع شعليه بفلوسي ،، جيبهن وروح صلي ،،
ماكو فايدة ،، ابو علي مقتنع قناعة كاملة ان صلاة الظهر هي الي تريح ضميره وتزيح عنه عبء كلام صاحب الفلوس ،،،
اما اصحاب علوة البصل وما ينتج عن تقشيره من دموع ،، الي همه اصحاب دغدغة المشاعر والتحرش بالمنطقة القلبية وخاصة بالنسبة للمواطن البسيط وحتى الغير بسيط ،، گولوا شلون !!
_ عيني ترى هذا الي ديصير بينا ابتلاء من رب العالمين ،،
_ اي عيني ادري شنو تعلميني ،،، اصلاً احنا گبل للجنة ،،
_ بس معرف اذا هو البلاء بي وقت معين ويخلص لو دائمي ؟ _ اش اش ،، لتحجين يمعوده يروحون يسمعوج،،
_ منو همه !!
_ الملائكة ،، المسؤولين عن الابتلاء ،، اخاف يشيلوا من عدنا ونفلس من الجنة،،
_ لا يمه حبيبة العفو ،، هلا بل البلاوي كل الهلا ،،
وهكذا يستمر سيناريو التلاعب بعواطف المواطن بأسم الدين ،، دون عمل يذكر ودون فهم ،، مجرد ترديد لما قاله فلان وجربه علان ،،،
اما نجاح اعمالنا فتأتي من تجارب الاخرين ،،،وليست نتاج بحثنا عن الحقيقة وممارستها ،، گولوا شلون !!
_ اگلج داده ،، ابني صارله رابع سنة بالبكلوريا يسقط يمكن مسويله عمل
_ شلون عرفتي مسويله عمل ؟
_ يگلي يمه كلما افوت للامتحان ولا كلمة اذكر من الكتاب
_ صدگ يحجي ،، لان ابن فخرية نفس الحالة ، خوب ذاك ثمن سنين بصف ثالث متوسط والعمل مشتغل عليه وكلما يروح للامتحان بس يكتب اسمه ويطلع
_ تالي شسوت فخرية ،، حتى اسوي مثلها ؟
_اول شي تصلين صلاة الناجحين ،، عددها الف ركعة بدون توقف
_ بس اني مراح امتحن ، ابني الاثول ساقط ،،
_ نفس الشي ماكو فرق انت وابنج ،، اهديها اله وهي تنفك الچبسة مالته ...
_ وبليه ميقرا ؟
_ ولا يفتح كتاب ،،، اگولها مجربه ،، ابن فخرية ثمن سنوات تالي نجح ،،،