Facebook
مفاجأة غير متوفعة PDF طباعة أرسل إلى صديق
الكاتب: لبنى الحسو   
الجمعة, 26 حزيران/يونيو 2015 17:51

 

lbnaaa copy copy copy copy copy
لايجوز تكرار النشر دون الاشارة لمجلة سطور

 

لما انطيت خبر لاهلي اني راح اجي لبغداد تحضروا بطريقة غير اعتيادية ،،
الي طلع على بعير لساحة المغفور له عباس بن فرناس والي كان لابس هدوم العيد وينتظرني بالبيت ،، والي لبس قناع مال ميكي ماوس وسوالي ( دي ) ،، والي سوه نفسه نايم ومن دخلت فز من النوم ،،
فكانت الحفاوة شي غير طبيعي ولا اعتيادي ،،،
كلها بجفة والي صار بيوم وصولي وتحديداً ساعة عشرة بالليل بجفة ،،،
_ يلله خلي اوديج هسة للفقمة تاكلين موطا
_ هااا ،، لا اني ما احب الموطا
_ طول عمرج تحبيها شنو الي صار
_ بصراحة اني اخاف مو ما احب الموطا ،، بس اخاف اطلع بالليل ابغداد كلشي يصير
_ والله ماكو شي ،، احنا عايشين احسن منكم لا نخاف ولا نهاب الموت ،، گومي گومي جبانة
اني گلبي ممرتاح للطلعة بس گلت ما اخلي ابال اختي لا تنقهر خطية ،،، مشينا حوالي خمس دقايق بالفروع الي تودي للشارع الرئيسي والا سيارة حمرا توگفلنا بالعرض ،، وينزل منها واحد باتجاهي وشايل مسدس ،،
،،
اريد اذكر شي من البسملة حتى لو الحرف الاول مو من القرآن ماكو ،، اريد اعرف شنو ينگال بهيجي مناسبات !! او شنو التصرف الصحيح ، هم ملگيت ،،
_ نزلي بسرعة وتعاي ويانا ،،
_ لا انت تعال ويانا رايحين ناكل موطا اني عازمتك
_ دنزلي لا انزلج گوة ،، شنو جاي اشاقى وياج اني
_ والله اني مدا اشاقى ،، اني رايحة اكل موطا ويا اختي ،، اذا تحب اخذ اختي وياك واني ارجع للبيت
_ ترى دوختيني بلا لغوة زايدة ،، هسة ترى افرغ المسدس براسج
_ لا لا لصير عصبي متسوة جاية وياك ،، شو وخر مسدسك
من نزلت من السيارة ،، شفت اختي رجعت بگ واخذت سيارتها وراحت ،،
لا يانذلة عفتيني بهل الموقف ،، ويا قطاعين الطرق بسيطة اشوفج بالاخرة واعلمج ،،،
_ عفية سيارتك مابيها تبريد ضجت
_ لضوجين مبقا شي ونوصل ،،
_ زين وخر الوصلة عن عيني اريد اشوف
_ ششوفين ؟ ماكو شي ينشاف سكتي ثولتينه
_ زين خليلي فد اغنية غير هاي الي حاطها لان ما احبها
_ ماعندي غيرها ،،،
هذا الحجي اني گاعدة بالمقعد الخلفي ،، والي خطفني گدام يم السايق والسايق ساكت ولا كلمة على الاكثر جان اخرس لان كلما كان يضرب بريك الخاطف يگله يا اثول على كيفك وميرد عليه ،، ووحدة مرية گاعدة بصفي لازمة ايدي عود تخاف لا انهزم ،،
وصلنا بعد عشر دقايق لفد مكان شعرت باب گراج انفتح وبعد دخولنا انغلق وتزنجل يعني حتى فكرة اني من انزل من السيارة وانهزم راحت ،، خلص اني ميتة ميتة ،، گمت افكر باخر امنية اريدها تتحققلي شنو !! احتمال يعرضون عليه هذا العرض ،، فگلت اطلب نفر معلاگ ونفر كباب ،،بما انه جيت متوازية على الاكل العراقي ، عاد احصل شي من السفرة ، شطلب مثلاً غير الاكل ،، ؟ ما لگيت شي مهم جداً بلحظات الموت الاخيرة ، ،
نزلت من السيارة والرجال لازمني من ايدي ودخلني لمكان مبين مطبخ من ريحة الاكل بس الريحة طيبة كانت ،،
شال الوصلة عن عيني واشوف بيت اخوية والجهال واللمة كلها مسوييلي مفاجعة ،،،
_ هاااااا شلون مفاجأة بشرفج مو تونستي !!!
_ الله فد تونست ،، شبيكم لخاطر الله حتى شقا بعد متعرفون تتشاقون ،،