Facebook
جلسة عراقية PDF طباعة أرسل إلى صديق
الكاتب: لبنى الحسو   
الخميس, 25 حزيران/يونيو 2015 09:17

 

lbnaaa copy
لايجوز تكرار النشر دون الاشارة لمجلة سطور

 

متحلى الكعدة العراقية اذا كانت نسائية او رجالية الا بنقاشات على مستوى القعدة ،،
فاذا كانوا زلم كانت السياسة خير مايبدون احاديثهم بيها والحديث عن العراق ومآسيه ،، ومن هذا الحديث يتفرع الحديث الديني ،، ولان الزلم عقلهم اكبر بكثير من النسوان ميحتدون كلش خاصة اذا كانت الجلسة حميمية وبين اصدقاء ،، فمن الحديث الديني يتفرع الحديث الطائفي والتفرقة اللعينة الي اصابت العراقيين بالسنوات الاخيرة ،، واني اشهد ان كل رجال العراق يرفضون الطائفية بس يطبقوها ( شكو بيها عادي ) ،،
ززززززززين شوكت يحلى الجو ؟ لما يتفرع من الحديث الديني الحديث عن النسوان ،، وتبدي اصوات الضحك تعلى بعد ان كان صوت الحق والعدل والموازنة والمحاصصة ،،، بصراحة اني ما كاعدة ويا زلم حتى انقللكم بالتفصيل الممل شنو الي يدور بالجلسات يمكن غيري افضل مني بالنقل ،،خاصة اذا كان عنده ضمير حي يرزق وجرأة وينقللنا مايدور في جلسات الجنس الخشن ،،، لكن ممكن اتخيل ،،
_ لكن اكدر انقللكم جلسة نسائية صغيرة ،،، شلون تبدي وشنو يدور بيها من نقاشات ظاهرها سليم
لكن هي جدل غالباً مايكون غير مقنع ومامستندين على اي حقيقة لاي معلومة من الي يكولوها سوى انها سمعتها من فلان او فلانة واقتنعت بيها عاد لازم الكاعدين كلهم يقتنعون وياها ،،،
فتبدي الجلسة بحديث تصاعدي مؤلم عن الكفاح اليومي ويا البيت والاولاد والرجال ،، نقاشات البيت تاخذ اقصى شي خمس دقايق،، والاولاد اكثر شوية ،، اما الحديث عن الرجل ،، ففرمه ونقده وتفليسه وتفليشه فد متعة نسائية لا يضاهيها متعة ،،، خاصة لما يبدون بالمبالغة ،، هاي الي تكول والله رچلي ميكدر ساعة بدوني ،، يتخبل ،، بس يدور عليه ، ( بدا الچذب ) ،، والخ تكول اني رچلي كل يوم يدخل عليه بيده وردة حمرا لان مصور الفلانتاين كل ايام السنة ،،بس هاي الفرحة تنقلب الى ترحة اذا وحدة من الكاعدات كالت الحقيقة المرة وشلون رچلها يعاملها بقساوة فيطبكون وياها كل الحاضرات ويخلون البهارات والملح كمنكهات للموضوع ،،،،وتبدي اصوات الاهات والحسرات ،،
وبصراحة اني استمتع بهاي السوالف لان تكون مادة دسمة لقلمي بس لما تنتهي فقرة الرجال وتبدي الفقرة الدينية تبدي اعصابي اسوي ،، ززززززززززززز،،، نننننننننننن ،،
، لان النقاش مثلاً يدور حول صحة الصلاة وجوازها في حالة تسبيل اليدين لو التكتيف ؟؟
ويعلى الصوت شوية شوية وهاي تكول لا ميصير لازم تنزل الايد والخ تكول عيني النبي الف الصلاة والسلام عليه صله مجتف ومسبل شكو بعد ،
، وراها تجي وحدة تكول ، ليش انتي جنتي ويا وشفتيه ؟
والي تگول ترى الوضوء فوگ الجوارب حلال واجاوبها الثانية هسة دنزعيها شدعوة عليج هل العجز ،،
القصة تبدي تكبر وراسي يبيدي يصدع بس مضطرة اسمع وين اروح يعني العشا وبعد مصابيه ،، فأنطي رايي على گد معلوماتي الدينية البسيطة وهو ان الصلاة هي صلة بين العبد والرب ومراح يحاسبنه على الحركة الي انسويها او منسويها ،، فتجيني الصواريخ ،، هاي شنو عيني لولو ،، شنو ربچ غير شكل ؟ هاي الحركات هي الدين ،، لعد ليش حطوها ؟
عيني حطوها على عيني وراسي كقواعد عامة ،، يعني مثل القانون لما يصير بي استثناءات ،،
وطبعاً لو اضرب راسي بالاربع حيطان الي حولي حتى اغير نظرتهم للدين ولفهم الدين ،، ما اگدر ،،
فأجباري اگول بيني وبين نفسي ،، لعد شعانيت فدوة لاسمك محمد ( ص ) ويا هل البشرية !!!